繼續我嘅"密密敷●清貨大行動"，講咗3W Clinic Fresh系列幾款mask，今日嚟到最後一塊，感覺捱完終於可以脫苦海啦~
蝸牛面膜小資料
包裝：獨立片裝(1盒10片)
容量：23ML
質地：純棉
產地：韓國
價錢：HK$78.5
官方資料
◎含豐富的天然膠原質、蝸牛黏液、彈力蛋白、蛋白質、多種維生素、甘醇酸等。
◎蝸牛黏液中天然的甘醇酸，能促進肌膚的新陳代謝，同時，將所含之美膚滋養成分帶入肌膚深層，修複肌膚，進而恢複肌膚的柔軟、光滑、細緻， 達到保濕、抗皺、抗痘等功效。
用後感覺
◎經過幾次試用同系列fresh嘅mask，都知道佢嘅精華唔係好夠洗，我事前已經用保濕精華打定個底先，希望敷完出嚟效果可以好啲。
◎打撕開包裝袋，拎塊mask出嚟就知大件事啦，睇落啲精華好似好夠咁，但係其實佢個texture係好杰撻撻，未敷上面對手都已經好有黏膩感。
◎正式上面兩個字形容晒，真係"極差"囉，純棉膜紙極厚，敷上去已經唔舒服，啲精華質地又黏膩，上咗面直頭有焗嘅感覺，都未敷到15分鐘(官方時間係20-30分鐘)，已經覺得乾同繃緊，撕走塊mask係有少少精華喺面，但我忍受唔到嗰種黏膩感，要即刻走去過水先得，過完水只係覺得得好繃緊，保濕嘅效果就一啲都feel唔到，要重復再搽保濕精華+面霜，塊面先覺得舒服番啲，OMG！！！我真係好少敷一隻mask，有咁抗拒嘅感覺，所以我真係強烈唔建議大家試，絕對係浪漫金錢同時間 =_=
近期熱爆全城嘅"爆炸糖"水洗面膜，網上有唔少用家都大推佢有幾好用、幾work，終於經過我親身試用，等我都同大家分享下我嘅用後感啦 ^_^
星星爆炸糖面膜小資料
包裝：獨立小盒裝(12小盒+粉)+面膜掃
容量：2g*12 stick + 7g*12 pack
質地：漿糊狀
產地：韓國
正價價錢：HK$140.0
官方資料
◎解決夏天常見問題，如出油過多，毛孔閉塞等，去除多餘油脂，和老化角質，舒緩皮膚，清走黑頭白頭，清走毛孔內垃圾，收細毛孔，令皮膚回復光澤，CO2為肌膚注氧去黃，改善皮膚暗啞問題，男女都可使用。
使用方法
◎把Topping star power倒進面膜，使用附送的面膜掃攪拌，由額頭、臉頰、下巴、鼻子塗上面膜，等待5-10分鐘後沖水。
用後感覺
◎先講佢個packing，打開分成12小盒+12小包，12小盒分成3層，每part 4盒為一組，另加1支面膜掃。個set我特別鍾意支面膜掃，因為打開就即刻可以用，唔洗自己又額外搵支捧嚟攪，真係超buy佢嘅方便，呢個design好貼心，I like it！
◎打開個pack，裡面有一嚿好似"濕咗嘅泥膠狀"物體，加入1包星星糖，唔好講笑，佢唔只個賣相(形狀)似爆炸糖，就連個質感都同食得嘅爆炸糖一樣，倒落個pack到重會聽到啪啪聲，一路mix佢一路keep住有爆聲，十足十啲爆炸糖喺個口到爆緊咁。
◎mix完用面膜掃直接搽上面，上面感覺都好funny，因為佢會喺您面上繼續爆，不過大家唔洗太擔心，個感覺係好輕微唔會覺得痛或者唔舒服嘅，同埋唔好睇佢細細盒，佢嘅份量係超級足夠，我第一層已經厚厚咁搽，搽完都重有剩可以再on top敷多層，敷上去一陣會聽到炸炸聲，原來佢係會慢慢自動起泡，敷完10分鐘過水，毛孔明顯收細、皮膚望落白淨同有光澤咗。
◎總括嚟講，呢個"爆炸糖"唔只玩得重用得，我個人係幾滿意佢嘅效果，同埋我本身鍾意獨立包裝嘅packing，覺得咁樣啲品質會keep得好啲，以一盒可以做12次嚟計，佢嘅價錢都算係好親民，為起都係十零蚊一次，大家都不妨買盒嚟試下，我自己用完都會keep住再回購。
