Bicelle Hydra B5 Gel

急不及待，試咗之前買Beauty Box裡面包嗰支Bicelle B5 Gel，其實都有好多blogger介紹過，話佢有幾好用、幾保濕、幾鎖水，一路都心思思想買嚟試，但係礙於佢價錢真係唔平，要成4百幾蚊一支，所以遲遲都未帶佢返屋企，點知無意中見到Neo Derm Beauty 10月號Beauty Box包咗佢，價錢只係$120重要連埋其他sample，梗係諗都唔洗諗，即刻訂番set嚟試下先啦！







全效維他命B5補濕精華小資料
包裝：滴管樽狀
容量：30ML
質地：水狀
產地：美國
正價價錢：HK$420.0


官方資料
◎成分 - 透明質酸、維他命B5、綠茶精華、甘油、活胜肽、積雪華。

◎功效 - 迅速注入1000倍水分至肌膚底層、減退幼紋、乾紋，回復水盈細滑、鎖緊水分於肌膚底層，持久保濕。

用後感覺
◎未開前確實係充滿期待，始終大家都推佢推得好行，我自己本身係混合性偏乾皮膚，加上天氣都開始轉涼，所以都好想搵隻"保濕又鎖水"嘅精華，遲不宜遲，即刻試下佢效果有幾好先？

◎打開揼咗兩揼，就有手掌嘅份量，質地好水唔似一般精華咁杰身，搽上面+頸按摩再輕拍至吸收，佢都幾親膚同幾易吸收，搽完感覺就有層薄cover住，但就唔會話有黏膩感嘅。


◎佢嘅效果真係唔錯，做到即時保水效果，最正係佢keep到鎖水，初時我都無為意嘅，直到第二朝起身塊面仍然水潤，唯一美中不足係，佢個味道怪怪，有啲剌鼻嘅臭味，真係令人有啲抗拒，我印象中佢係"無色、無味"先啱，所以我上網search下資料，發覺有用家同我情況一樣，話懷疑係買到假貨/過期貨。

◎我自己就覺得，買到假貨嘅可能性就比較低，因為我係經Neo Derm Beauty直購送貨，反而我就擔心產品嘅有效期多啲，所以我喺facebook同佢地聯絡，您好，我早前收到BEAUTY BOX，尋日先開嚟用，我上網睇介紹，支B5 GEL唔係無色無味? 點解我嗰支B5 GEL會有臭味? 一心想了解清楚究竟係邊part出現問題？之後得到佢地回覆：你好，B5 Gel係純天然及冇任何香料加工，並且B5 Gel內含植物成份，以致有這種氣味。可以放心使用:) 謝謝 既然佢地reply得ok無問題，我都會放心用埋去，不過陣味真係有啲難頂，我自己就唔係咁接受，用完都唔會再回購，若果有興趣買嘅朋友仔，建議大家可以親身試下個味先再作決定。

Thayers Rose Petal Witch Hazel



今次試用咗好多用家都讚不絕口Thayers嘅"玫瑰花花水"，我揀佢嘅原因係因為佢無酒精、成分又夠天然，特別係佢嘅formual好fit到我需要。

 

呢個系列爽膚水有7款俾大家揀，分別係"無味、原味、檸檬、黃瓜、蘆薈、玫瑰花、同薰衣草"，另外佢唔係款款都無酒精嘅，想揀無酒精成分嘅朋友就要注意。我個人比較偏好用玫瑰味嘅產品，加上我係混合性偏乾皮膚，見佢成分有保濕嘅蘆薈，索性就揀咗呢款嚟試下。

金鏤梅玫瑰花蘆薈爽膚水小資料

包裝：膠樽裝

容量：12fl oz (355ml)

質地：水狀

產地：美國

正價價錢：HK$98.0

 

官方資料

◎Thayer純玫瑰花水，Alcohol-Free Toner 不含酒精，醉人的玫瑰芳香溫柔呵護著肌膚，一直深受眾多女性所青睞。

 

◎超強保濕，鎮靜滋潤，水嫩緊致，抗氧防皺，浪漫迷人。獨家配方的金縷梅精華、玫瑰花瓣水、有機認證蘆薈，維他命E，葡萄籽精華，天然香精等，萃取後的金縷梅不含酒精成份。

 

◎適合所有膚質，特別是敏感膚質，尤其是中性或偏乾的膚質。

 

 

 

 

成份簡介

◎金縷梅 : 有效收毛孔及預防毛孔閉塞，同時有效抗氧化。

◎玫瑰花瓣 : 玫瑰花瓣是具有抗衰老功效的天然植物，玫瑰的清幽花香能夠有效舒壓。

◎有機認證蘆薈 : 強效鎖水保濕及有放預防抵抗外來刺激。

◎維他命E : 抗衰老。

 

 

用後感覺

◎先唔講佢好唔好用先，淨以價錢$98嚟計(iherb網購重可以再平啲$6x就買到支)，有335ml容量嚟講，佢真係好鬼抵用，大大支豪住用都唔會肉痛。
 

 

◎打開樽蓋有鍚紙封口，絕對保正產品新鮮。

◎爽膚水用法 - 由於佢價錢親民，我會倒多啲落棉花抹面+頸，濕咗塊面再拍至吸收，用完真係覺得好保濕，同埋佢嘅玫瑰香味好靚，令人有好fresh嘅感覺。

◎濕敷面膜用法 - 將玫瑰水倒落杯仔，加入面膜紙浸濕再敷上面，一路敷一路聞到玫瑰清香，個人可以好relax，敷5-10分鐘撕走，保水效果真係好好，塊面即時飲飽水，上妝前用嚟急救皮膚就一流啦！

◎題外話：我用嘅壓縮面膜紙係Kose出品，佢質地厚薄適中唔焗身，加上佢cutting唔錯做到好貼面。

◎保濕噴霧用法 - 倒落噴霧樽仔帶出街，可以當佢moisture moist，噴上面即時幫您保水，重有陣陣玫瑰清香，細細樽方便攜帶，隨時拎出嚟用都得。

 

溫馨提示

◎Thayers呢個brand喺香港暫時未有shop、亦無設任何專櫃，想了解多啲佢地嘅產品，可以clikc條link去睇下http://www.thayers.com/?fa=home，另外若果有興趣試嘅朋友仔，除咗喺美國網站www.iherb.com訂番嚟之外，都可以去ig shop、Yahoo拍賣搵到，我就諗住買1支試下，好用先再喺iherb訂，但又怕香港網上會買到假貨，所以我就搵信譽較好嘅舖頭(黑咪小店)落order，佢地暫時只得一間店喺銅鑼灣，親身上舖重可以試下個texture啱唔啱您，銅鑼灣唔近您都唔緊要，因為佢地嘅價錢本身已經包咗平郵，可以上佢地fb睇product再eamil落order，我買完一星期內就收到貨，我自己就幾buy網上購物，覺得方便又快捷，安坐家中就可以收貨lu ^_^