最近不論係睇電視、報紙、雜誌，都經常會見到由亞Sa做代言Kose CT嘅面膜廣告，面膜更加標榜喺日本9年銷量No. 1，而Clear Turn系列有5款針對性功效mask俾您揀，我自己就買咗2盒嚟試，分別係保濕嘅粉盒、同美白嘅黃盒。
維他命C美白面膜資料
包裝：獨立片裝(1盒5片)
美容液容量：22ML
質地：棉籽絨
產地：日本
正價價錢：HK$59.0
官方資料
◎使用厚實的Bemliese® (銅氨纖維不織布)膚觸溫和柔軟、具豐潤密實感的面膜，宛如被肌膚吸附般服貼，舒適地緊密貼合，亦可同時保養眼周。
◎添加保濕因子(絲胺酸‧PCA-Na(保濕因子)‧乳酸鈉)面膜密著度極佳，能使具有高潤澤效果的濃潤美容液深層浸透至肌膚角質層，能真實感受肌膚滋潤感滿溢。
◎使用美作溫泉水(保濕)調理肌膚宛如剛泡完澡般膨潤，能真實感受到肌膚上粧時粧感更加服貼。
◎對肌膚溫和的配方，弱酸性‧無香料‧無色素‧無礦物油‧無酒精(乙醇)。
用後感覺
◎拆開包裝袋，濃潤嘅22ml精華液好足夠，面膜係連埋眼位設計，可以一次過做埋eye mask。
◎棉籽絨質地無咩彈性，但上面都好貼服、好舒適，唔會話厚身同焗身，同埋啲精華液唔會話一路敷一路滴，唯一美中不足係mask嘅size略嫌大咗啲，敷上去oversize咗會整濕啲髮邊。
◎敷完10分鐘效果唔錯，膚色即時明亮同水潤咗，輕輕按摩幾下啲精華已經吸收晒，塊面好似飲飽水重有少少彈滑，亮白效果都唔錯keep到2日，overall個用後感嚟講，佢可以用"平靚正"嚟形容，真心覺得值得推介俾大家。
而家好多機構都有舉辦媽媽講座，最近都有啲朋友仔嚟問我呢方面嘅咨詢，原來大家對於呢啲講座都唔係話太清楚，所以想由今次起詳細啲同大家分享下，希望幫到啲新手爸媽了解多啲先報名，盡量可以揀到適合自己需要嘅講座參加。事不宜遲，即刻同大家share下，尋晚我同老公參加咗Ubaby悅寶貝+Sophie La Girafe聯合舉辦嘅"初生嬰兒護理知多D"講座先 ^_^
官方資料
日期：2015年12月9日
時間：下午7時至9時
課程人數：250
講者：星級陪月導師劉慧嫦小姐
對象：準父母及新手爸媽
地點：尖沙咀科學館演講廳(科學館道二號)
內容：嬰兒沐浴小貼士、嬰兒掃風技巧、嬰兒皮膚護理
簡介：初生寶寶的日常護理看似輕易，實質內裡大有學問，因此很多新手父母在照顧小寶寶時都會顯得手忙腳亂，不知從何入手。星級陪月導師將會傳授各種正確的育兒技巧和護理須知，助新手爸媽湊B變得得心應手。
講座時間7點開始(大會建議早15分鐘到達登記入場)，我搭地鐵尖沙咀P2出口行過去，去到嘅時候都差唔多7點，先喺演講廳門外排隊登記，條人龍都唔短不過好快就輪到，排到嘅時候只需提供手提號碼做登記，職員就會派發書仔、問卷、入會申請表同一張抽獎號碼紙俾您，另外場內重有"美讚臣A+"WeChat註冊會員單張，成功綁定微信就會送您膠兜型口水肩一個。
由於演講廳唔俾食嘢、講座又去到9點鐘嘅關係，好多新手爸爸媽咪都會係場內先食嘢，最攪笑係成場見得最多就係McDonald，個個都拎住個包喺到係咁食，我同老公都係食麥記(我食魚柳包走醬+4件脆香雞翼，老公就試新嘢食北海道三文魚堡套餐)，食食下工作人員宣佈5分鐘後講座會開始，我同老公食完大概7點半左右先入場。
入到場內係自由坐位，我地入去嘅時候Sophie La Girafe嘅代表已經介紹緊佢地嘅"天然有機"bb產品，介紹完一輪產品之後，就由陪月導師劉慧嫦小姐教bb沖涼技巧、洗臍帶、掃風同皮膚護理，由於我地坐喺山頂位置，離個講台其實又高又遠，基本上都睇唔到啲咩技巧，純粹係聽佢講同睇個screen啲文字，唔知係咪遲咗開始嘅關係，講者時間好似有啲趕住趕住，好快講完就輪到最後抽獎環節，會分別抽出3位得獎者，可以得到由Sophie La Girafe送出嘅bb產品一支，抽完獎個講座就正式結束可以走人。
完場時喺場外交番問卷同入會申請表，就會送一袋仔小禮物包，喺Sophie La Girafe嘅試用產品，另外Sophie La Girafe亦都有喺場外set counter賣product，即場購買會有半價優惠俾大家。
總括成個講座，坐位、環境都算係幾舒適，係平日放工時間比較趕咗啲，講座時間要成2個鐘，加上中間無break一定要食咗嘢先好，同埋講者嘅距離太遠，又無screen shot可以睇到，實用性就相對比較低咗啲啦！
***溫馨提示
Ubaby每月都有唔少講座舉行，有興趣嘅朋友仔可以click去網站睇下http://www.ubabygroup.com/?section=NewsEvents
