Trilogy有機認証玫瑰果油

急不及待試咗兩樣之前團購返嚟嘅產品，先講下我支"玫瑰果油"，點解我無啦啦會留意佢呢？？事源係最近我想搵支可以搽妊娠紋嘅產品，有日無意中俾我喺團購見到，而佢又標榜係有機認証，又聲稱凱特王妃孕期必備護理品，就係咁我就俾佢吸引買咗lu~

玫瑰果油小資料
包裝：滴管樽裝
容量：45ml
質地：水狀
產地：新西蘭
正價價錢：HK$420.0

官方資料指出，呢支果油係100%有機認證，不含香料、防腐劑、色素、化學物質，可以用得放心。

果油中玫瑰果種以冷壓法去提取，含有天然亞麻油酸、脂肪酸、檸檬酸及多種維他命，性質溫和，適用於任何肌膚，敏感肌膚尤其適合。而當中含人體80%必需嘅脂肪酸，有助顯著修護疤痕、妊娠紋、皺紋，可改善疤痕色素，増強肌膚保濕力，減少皺紋，提升皮膚平滑度。

同時果油為肌膚提供良好的抗衰老功能，有柔軟、美白、抗皺功能，加上具組織再生功能，能有效改變疤痕及明亮肌膚，對提升皮膚水份功效十分顯著，而且更能預防日曬後色素沉澱及修護曬後肌膚。而果油的組織再生效果，較其他的植物油更為顯著，例如灼傷、燙傷或手術後的疤痕、甚至老舊的疤痕，都有非常獨特減淡疤痕的功效。

細力揼一下，出嚟份量唔算太多，當然要視乎番您要搽嘅地方，若果範圍細，其實幾滴都已經好足夠。而我要搽嘅地方係肚仔，所以我先揼一下喺掌心，再雙手搓熱啲果油，先再以打圈方式搽喺個肚，由於範圍較大，我再揼多一下，又再重覆搓熱同搽，搽咗兩次覺得已經cover晒成個肚，我就再慢慢打圈按摩多一陣。

搽完感覺出奇地良好，一般我都唔係咁鍾意用油，以往搽完油喺面，按極吸收完都好，都總係keep住有種油笠笠嘅感覺，但今次無呢種感覺不特只，佢嘅滲透力重係超強，吸收比一般果油快同乾爽，我試過將2滴油滴喺手背，慢慢打圈按咗一陣，佢就己經吸晒入去，感覺即時做到保濕，而表面睇上去重光滑咗添！



呢支玫瑰果油原價$420，我以團購價$243買返嚟，以有機產品嚟睇，可以用2百幾蚊買到確係幾抵用，我keep住用咗一個星期，個肚仔摸落已經滑嘟嘟，講保濕同提升皮膚平滑度嘅效果，我個人係幾滿意嘅，但係講到減淡疤痕，我就未試到呢方面嘅功效，若果佢真係做到呢個效果，原價$420我都肯俾佢呀 ^_^


 

Gift for me - Naked 2 Urban Decay Basics

又嚟Give for me，今次收到嘅係"聞名不如見面"成日都聽到/見到人介紹、推介嘅人氣"美國馳名手信"Naked嘅皇牌眼影盒，嘻嘻，有得免費試用，真係多謝晒喔 ^_^

 

除去外盒，個包裝係好simple，一啲都唔賣弄花巧華麗，唔似Anna Sui、Jill Stuart、too cool for school嗰啲咁吸引(通常我買嘢，一半都係敗係個design手上囉)，個pattern比較啱鍾意簡單、較成熟、以實用為主嘅朋友仔，加上聽過佢大名嘅朋友都知，Naked出名粉質幼細、上色度出色，唔易跌粉兼long lasting，所以佢地嘅賣點都係sell quality唔係sell fashion啦~

 

 

打開盒basics eyeshadow palette，有6個colours，由左至右分別係Skimp、Stark、Frisk、Cover、Primal、Undone，我呢盒係大地色系，好適合鍾意化淡妝嘅sis，一盒可以由打底、深淺漸變、甚至連畫眉、眼線都可以照顧得到，袋喺手袋傍身真係最方便不過。

 

順帶一提，之前Naked喺香港未有專櫃，若果想買可以喺水貨店、網店、又或者係去外國網站買，佢嘅價錢大概係US$26-29，對換後約2百幾蚊港紙到(呢個價當然未計shipping fee，一般外國網站買over某個價錢，都可以免個運費俾您，大家夾埋有興趣嘅朋友一齊買，咁樣就會化算好多啦)，但而家佢地嘅品牌專櫃，喺6月25日已經喺尖沙咀海運大廈正式開幕，我個人覺得，以咁嘅價錢可以買到6隻色嘅眼影，重要佢地係咁有質數，真心係好物超所值嘅，而佢地嘅palette有分1、2、3代，有興趣嘅朋友可以去專櫃試下色，睇下邊款啱您心水啲。