ChicayChico Topping Star Mask & Powder Kit

近期熱爆全城嘅"爆炸糖"水洗面膜，網上有唔少用家都大推佢有幾好用、幾work，終於經過我親身試用，等我都同大家分享下我嘅用後感啦 ^_^

星星爆炸糖面膜小資料
包裝：獨立小盒裝(12小盒+粉)+面膜掃
容量：2g*12 stick + 7g*12 pack
質地：漿糊狀
產地：韓國
正價價錢：HK$140.0

官方資料
◎解決夏天常見問題，如出油過多，毛孔閉塞等，去除多餘油脂，和老化角質，舒緩皮膚，清走黑頭白頭，清走毛孔內垃圾，收細毛孔，令皮膚回復光澤，CO2為肌膚注氧去黃，改善皮膚暗啞問題，男女都可使用。

使用方法
◎把Topping star power倒進面膜，使用附送的面膜掃攪拌，由額頭、臉頰、下巴、鼻子塗上面膜，等待5-10分鐘後沖水。

用後感覺
◎先講佢個packing，打開分成12小盒+12小包，12小盒分成3層，每part 4盒為一組，另加1支面膜掃。個set我特別鍾意支面膜掃，因為打開就即刻可以用，唔洗自己又額外搵支捧嚟攪，真係超buy佢嘅方便，呢個design好貼心，I like it！

◎打開個pack，裡面有一嚿好似"濕咗嘅泥膠狀"物體，加入1包星星糖，唔好講笑，佢唔只個賣相(形狀)似爆炸糖，就連個質感都同食得嘅爆炸糖一樣，倒落個pack到重會聽到啪啪聲，一路mix佢一路keep住有爆聲，十足十啲爆炸糖喺個口到爆緊咁。

◎mix完用面膜掃直接搽上面，上面感覺都好funny，因為佢會喺您面上繼續爆，不過大家唔洗太擔心，個感覺係好輕微唔會覺得痛或者唔舒服嘅，同埋唔好睇佢細細盒，佢嘅份量係超級足夠，我第一層已經厚厚咁搽，搽完都重有剩可以再on top敷多層，敷上去一陣會聽到炸炸聲，原來佢係會慢慢自動起泡，敷完10分鐘過水，毛孔明顯收細、皮膚望落白淨同有光澤咗。

◎總括嚟講，呢個"爆炸糖"唔只玩得重用得，我個人係幾滿意佢嘅效果，同埋我本身鍾意獨立包裝嘅packing，覺得咁樣啲品質會keep得好啲，以一盒可以做12次嚟計，佢嘅價錢都算係好親民，為起都係十零蚊一次，大家都不妨買盒嚟試下，我自己用完都會keep住再回購。

Bio-essence Deep Exfoliating Gel - Sensitive Skin

一講Bio-essence，大家都會諗起佢支皇牌"去死皮啫喱"架啦，最近佢推出咗2支新配方，我就試左手面(粉色)嗰支，係添加咗洋甘菊嘅抗敏配方，睇下佢有咩唔同、又有幾work先~

深層去角質青春素小資料
包裝：支裝
容量：10g (試用裝)
質地：啫喱狀
產地：新加坡
正價價錢：HK$189.0/60ml

 

 

 

官方資料
◎原理：軟化型，非刺激性，零磨砂粒子，啫喱軟化角質，溫和揉走死皮。

◎用法：潔面前打圈按摩，瞬間揉出死皮污垢，以水洗淨，速效易用。

◎功效：多功效，去死皮同時清除黑頭粉刺、淡印、收毛孔、淨白亮膚。

◎副作用：溫和親膚無副作用，有效保濕肌膚，適合任何膚質天天使用。

◎零磨砂粒子啫喱，溫和保濕不刺激肌膚。瞬間揉除老廢角質，增強肌膚吸收力。清除黑頭粉刺、淡印控油、細緻毛孔。平滑粗糙肌膚，白滑透亮，上妝更易更貼服。可用在皮膚較薄位置(眼周及嘴角)及死皮較多部位(頸部、手肘、膝蓋及腳肘)。

用後感覺
◎唧出嚟Gel狀質地，放上面打圈按摩，T字位、嘴角位，唔洗點出力按，一陣就出現擦子膠碎。

◎洗完面，感覺都幾良好、幾舒服，皮膚唔會覺得乾同蹦緊，摸上面即時滑溜晒，另外我亦試上手俾大家睇下，佢嘅擦子膠碎係好細微。

◎佢地selling point係"溫和親膚、可天天使用"，以質地同上面按摩情況計，佢都幾soft唔會話傷皮膚嘅，不過我個人就無試過日日用，通常一星期用一至兩次到，同埋去完角質再敷mask效果真係會好啲，大家都不妨試下。

溫馨提示
◎呢隻深層去角質青春素有3個配方，大家可以因應自己膚質去揀隻啱用嘅，咁樣就切合到唔同需要嘅您啦~

(1). 水潤(黃色) - 任何肌膚適用，蜂王漿保濕，保濕肌膚，不帶走水分，維持水潤細緻的肌膚。

(2). 控油(綠色) - 混合與油性肌膚適用，茶樹葉片控油，高效抗菌，對抗痘痘，淡印淡疤，平衡油脂。

(3). 抗敏(粉色) - 敏弱肌膚適用，洋甘菊舒緩，減低刺激，增強保護力，舒緩敏感，鎮靜肌膚。