Nutricia Program媽媽會講座

報咗幾個講座都幸運地抽中，所以07-Nov就去咗聽Nutricia Program嘅講座，可能因為時間係2點至4點嘅關係，去到大會有小食(水同餅乾)提供俾媽媽，感覺佢地幾貼心喎 ^_^

講座未開始時有份問卷俾您填，填完有工作人員嚟收番，之後就會送您一盒DHA丸，一盒有30粒，建議每日1粒，足夠您一個月嘅份量。







報講座嘅時候未有明確嘅topic提供，去到聽分咗3part，先有註冊瑜珈導師，教您做手腳伸展、按摩大小腿(去水腫)、收緊/放鬆會陰運動，之後就由註冊營養師負責，講解下飲食要注意啲咩，同餵人奶嘅知識同好處，最後就由講者推廣佢地嘅Nutricia Program。


講完晒所有topic，last一個環節就係寫信，大會會提供一個信封、1張咭、1pack貼紙(貼紙兩個媽媽share用1份)，for媽媽寫低自己嘅心聲、同有啲咩說話想同將來嘅bb講，寫完用貼紙裝飾同封好，再將地址寫喺信封面，交番俾在場工作人員就ok，6個月後Nutricia就會寄番封信俾大家。

 
我個人覺得講座嘅實用性唔算太高，同埋可以話係幾亂下，啲嘢好似講到一忽忽咁，講完成個Nutricia Program，我都唔係好明個main point係咩?同埋佢地嘅selling point喺邊?聽咗咁耐只知佢地有一個DHA丸，唯一我覺得最窩心嘅係寫信嗰part，見到身邊嘅媽媽有啲寫到眼濕濕，場面真係幾toucing！

離場時，每位媽媽都可以得到一個"多用途枕"，盒內附有說明書，教大家唔同需要時嘅用法，重跟埋一個迷你枕頭仔，係for將來bb食奶時承托頭部用，呢個枕用途都幾多，用落都覺得幾實用同舒適。

智多健AAA媽媽會講座

智多健AAA呢個名，本身就唔係太認識，不過撞啱見佢10月30日7點半有講座，就打去試下睇下報唔報到名，結果又好彩俾我成功登記，只係得40個名額都安排到參加，嗰晚放工先同老公先食dinner，食飽就齊齊行去聽講座。


去到講座地點，原來正正set喺Waston旗艦店裡面，個場劃得好細，唔怪得得40個名額，去到用留位號登記完，就有工作人員安排座位，坐低無耐個場已經full咗，我坐第2行其實都有少少辛苦，因為同個screen真係離得太近，坐第1行嗰啲真係要側身先睇到，另外眼見有媽媽嚟到無位坐，夾硬要喺個screen側邊加櫈，坐低根本就完全睇唔到個screen，安排上似乎係有啲失當。


呢場講座嘅主題係"孕婦及嬰兒健康"，講者係兒科醫生，成個talk都幾hard sell佢地嘅product，有好多slide都係同其他牌子做比較，同埋有好多醫學報告prove您睇啲成份，眼見好多人都聽到恰晒眼瞓，我自己都覺得真係聽到有啲悶，overall嚟講，孕婦同嬰兒知識欠奉，反而感覺係洗腦式教育，不停燒您買佢啲product。

完場時，每位媽媽可以獲得1個禮物包，有智多健嘅產品(奶粉、DHA丸、妊娠紋膏、尿墊)、亦有Waston嘅產品(洗頭水、護髮素、焗油、手霜、濕紙巾、嬰毛兒濕紙巾)，禮物相對個talk嘅內容就豐富得多啦 ^_^

美素佳兒+惠氏媽媽會講座

 



自懷孕起，身邊好多親朋戚友都推我join媽媽會，話有好多懷孕+bb資訊、免費試用/贈品送，到我join完啲媽媽會，真係收到唔同嘅禮品(圍肩、手套、紗巾、被包、濕紙巾、英語歌cd/dvd、媽媽奶粉、懷孕書籍等等)，初時以為啲媽媽會咁就完，直到朋友問起我有無聽講座，我先知道原來唔係咁嘅，新手嘅我經大家提醒之下，就上網search搵咗啲講座嚟報。

《惠氏產前講座 - 10月17日第2場》

 
網上聽到好多媽媽講"惠氏"舉辦嘅講座比較搶手，因為佢地提供"一人一b"俾媽媽做實習(一般講座只有講者做示範、媽媽爸爸係坐喺到聽同睇)，通常都要報幾次先會抽中，幸運地，我一次就抽中咗，就係咁參加咗人生第一次媽媽講座lu~
 
第一次聽媽媽講座，感覺都幾新鮮下，我呢場係12點至1點半，11點45分就開始登記入場，登記嘅時候需要核對電話號碼同姓名，然後會俾張坐枱label、唔同bb產品嘅入會form，跟住就會有專人安排您入座，門口有水機可以自助斟水飲。

內容方面就分開2part，第1part先由註冊營養師講解"準媽媽營養大解構"，會教準媽媽飲食上有咩要注意，第2part就由註冊助產士負責，講解"嬰幼兒用品面面觀"同埋"嬰兒洗澡、穿尿片及穿衣實習和示範"，呢個時候，枱下嘅準爸媽就可以用假b一齊跟住做，最後散場時，每位媽媽都會得到禮物包一份，禮物包都好豐富下，有紙尿片、洗頭沖涼液，迪士尼美語cd，DHA丸、紗巾等等。
 
參加完"惠氏"講座，接住就去咗"美素佳兒"2點至4點嗰場講座，去到又係先核對電話號碼同姓名做登記，跟住會俾3set飛仔您，1張係for去換三角枕，另外2張就係for試飲媽媽奶粉、同用媽媽奶粉整嘅甜品。開場前先安排換領三角枕，之後由工作人員安排座位俾您，內容分為3part，第1part都係由註冊營養師講解"懷孕期媽媽及寶寶十大營養須知"，跟住第2part大會安排咗試飲同試食，到第3part就由註冊助產士負責"實用育嬰技巧示範"，完成晒3part講座，散場時就會有一本懷孕書同媽媽奶粉送。

總括2個講座嚟講，我比較鍾意"惠氏"嗰個，始終有個假b俾您一齊互動，實用性就比較強一啲，至於禮物方面，就真係各有各好，"惠氏"勝在connection好，bb仔sample特別多，而"美素佳兒"sample相對地少，同都係自家品牌產品，但係佢個三角枕對於媽媽嚟講就好貼心，當晚返去我就即刻試用，真係好實用、好舒服。

《惠氏+美素佳兒講座禮物》

 

E.L.F. Lip Balm SPF15 Sunscreen

想同大家分享下，上次喺iherb買嘅『平靚正』唇膏，本身第一次用E.L.F.嘅product，初時係俾佢nude嘅顏色吸引，再睇多佢兩睇，見佢價錢只係hk$18.23、重要有埋SPF 15防曬，買支普通潤唇膏都唔得，真係諗都唔洗諗即刻加入cart到啦！

我呢支nude色唇膏，色號係#82602，係有少少偏橙tone嘅nude色，啲顏色搽出嚟好靚、好自然，睇相搽上手加燈光影相，折射出嚟好似有少少閃粉咁，但實際搽上嘴隻色係好自然唔會閃，同埋我最鍾意佢唇膏嘅滋潤度，試過無搽潤唇膏打底直接上嘴，佢都好夠潤嘴唔會乾、唔會顯唇紋，質素確實係幾好，以咁親民嘅價錢就買到，所以真心推俾大家，有興趣嘅朋友仔不妨去睇睇啦 ^_^

↓↓↓ E.L.F. Lip Balm SPF15 Sunscreen ↓↓↓

http://hk.iherb.com/E-L-F-Cosmetics-Studio-Lip-Balm-SPF-15-Nude-0-07-oz-2-1-g/54056

Neo Derm Beauty Box 11月號

尋日臨收工，收到11月號嘅Beauty Box，打開嚟睇有少少失望，個box係一個平平無其、超普通嘅四方形盒，並唔係八角形、抽屜款色嗰種嚟嘅，一啲都稱唔上beauty即刻幻滅晒囉 =_=

同fb嘅客服確認過，佢回覆：『現有客戶會收到長方形盒子，而新客戶會收到八角型盒子』，oh，唔知下個月係咪又係咁樣分呢？

11月號Beauty Box $120包括：
(1). Endocare 強效活肌修復精華
(2). 活力All Day & Night醫學護膚產品體驗裝
(3). NEO DERM 旗下品牌特選醫學美容療程免費體驗(於網上訂購時可同步選擇及預約時段)
(4). 9型肌底報告Skin CV
(5). 星級獨家驚喜：Annie G星級化妝師團隊教授《秋冬破格．玩色眼妝Brighten Up》+ ZALORA購物禮遇
(6). 每月回贈N$120現金獎賞予會員尊享網上購物優惠

- Endocare 強效活肌修復精華1ml*7

今期嘅selling point，唔好睇呢set精華細細支，原價要成$720架，而家$120就可以試用到，都真係咪話佢唔抵。

- Endocare Tensage Cream 5ml

- Exuviance Hydrating Eye Complex 2g 

- Exuviance Sheer Refining Fluid 2ml

- Exuviance Evening Restorative Complex 2g

 

除咗Endocare件貨size之外，重包埋1支Endocare同3包Exuviance嘅sample喺個box裡面，可以試用完啱洗先買都唔錯。

 



Nature Republic Forest Garden Chaomile Cleansing Oil

一向有用開NR嘅porduct，無論係爽膚水、面霜、精華、洗面膏、防曬液，佢嘅質量都係好good good，今次都一樣無令我失望，所以想同大家分享下，最近用緊Nature Republic呢支卸妝油，本身貪佢成分天然，點知潔面能力重唔錯，用後感都好令我滿意。

甘菊卸妝油資料
包裝：揼裝
容量：200ML
質地：油狀
產地：韓國
價錢：HK$85.0

官方資料
◎內含給予敏感性肌膚保護的有機甘菊成分，深層清潔、舒緩肌膚。純植物天然油成分，可放心使用。徹底清除BB霜、防曬霜、眼影、睫毛膏、唇膏等化妝品。在清潔的同時，向皮膚供應營養，保濕滋潤，有效鎮靜敏感的面部、眼部、唇部皮膚。

用後感覺
◎一般揼兩下份量就夠洗全面，記得先乾手乾面喺面上打圈按摩，按摩到咁上下就可以加水再按摩將佢乳化，最後以清水過面就可以lu。

◎洗緊同洗完面，成個過程都唔會繃緊，重keep住有種滋潤感，一般淡妝都卸得好乾淨，但講到落眼線、mascara就唔係太ok，唔可以一take過攪掂。
 
◎睇相都見我已經用咗大半樽，平日無化妝只係搽咗防曬，我都會用佢嚟卸妝，以$80幾蚊嘅價錢嚟講，含有機甘菊成分，用完覺得舒服、皮膚又唔會繃緊，我覺得佢絕對係物有所值，可以話係大眾化價錢，有興趣嘅朋友仔不妨買支嚟試下。