聖誕將至，好多店舖都陸續推出聖誕優惠，最近我睇中咗2間網店嘅christmas offer，所以就上網買咗啲skincare返嚟，喺到同大家分享下我買咗啲咩筍嘢。
Hanyul Rice Essential Set
先嚟第1間網店，呢間shop我耐不耐就會幫襯，買滿$400可免本地平郵，每次佢地都係搵courier送貨，暫時我買咗咁多次，都好滿意佢地嘅服務，以今次為例，我12月12號落單，12月15號就收到貨，安排出貨重會send email俾您，等您可以知道件貨嘅status，呢個服務可以話係幾貼心。
本身係Hanyul大米爽膚水忠實fans嘅我，今次見有set裝做promo，一心諗住可以試埋佢支大米乳液，所以就買咗set $495 (原價$640) 嘅"韓律大米軟膚"套裝，呢set套裝有5件product，分別係2件貨size+3件travel size，以christmas offer價嚟買平咗$145，比起韓國真係重要平得多。
(1). 大米軟膚精華爽膚水150ml
(2). 大米軟膚深層保濕乳液125ml
(3). 律呂原液導入精華5ml
(4). 黑豆抗衰老面霜5ml
(5). 黑豆緊緻睡眠面膜15ml
3支爽膚水+2支導入精華+1盒面膜+1支爽膚水+1樽沐浴露
輪到第2間網店，呢間係第1次幫襯，平日買滿$200可免費送貨，christmas offer折扣後$100就可以送貨，另外12月13號落單重有個extra offer，買滿$300送1支價值$32嘅Nature Republic手霜，咁吸引嘅offer您話真係邊到搵呢？
本身我係俾佢盒Line Mask吸引，一心買嚟送俾朋友做生日禮物，見買開嘢就順便睇下，有無咩特別嘢好買啦，結果俾我喺"限時優惠"昅到啲筍嘢，就順個便帶埋佢地返屋企，同時重可以攞埋extra offer支hand cream嘛！
(1). LG ON" The Body 香水沐浴露500ml $35 (OP$98)
(2). Secret Key 24K 金箔導入精華神仙水150ml $83 (OP$168)
(3). Secret Key 多功能神仙水升級版150ml $85 (OP$188)
(4). Mediheal x Line Friends N.M.F. 限量特別版面膜10塊 $130 (OP$160)
(5). Manyo Factory 酵母菌精華爽膚水158ml $158 (OP$228)
揀下揀下，最終揀咗$742，心諗$300就有1支hand cream送，而家7百幾蚊應該會有2支，就inbox去問問店員，店員回覆呢個offer係一次性唔可以累積，我再問佢咁分單做得唔得，覆番嚟話分單就可以送2支，於是我就分開2張單嚟落，同樣地我12月12號落單，網店收到我order時就話會有同事follow，叫我等同事call先好去銀行入數，等咗2日14號我再次inbox去查詢，店員就覆我晏啲會有同事跟進，到咗lunch前有人call嚟同我confirm order同金額，由於我趕住盒mask星期六送俾朋友，所以我lunch就嗱嗱聲趕去HSBC入數，入數後再inbox番張入數紙等收貨。
12月15號上晝收到courier，開嚟點貨1支hand cream都無送，我又再inbox去問下，點知店員回覆我：『謝謝惠顧，送hand cream 優惠至12月13日（即在13號前付款的單）^^
』 當刻我覺得佢地好取巧，由落單、落完單、到我查單，我都有提過hand cream嘅事，但佢地一路無正面覆實我，到收完貨再問先咁樣講，我再inbox話要合理解釋，佢地就話搵店長致電了解，我reject咗用電話同佢地傾，唔送hand cream都無所謂，只要一個合理嘅回覆，同埋我需要有record留底，結果佢地先覆嚟話係內部同事溝通問題、問我地址係咪一樣，會courier補番2支hand cream俾我。
Extra offer送嘅Nature Republic手霜
12月16日courier補送番2支hand cream嚟，其實問題唔係送唔送嗰2支hand cream俾我，我係覺得做生意要光明正大啲，若果優惠係按入數日子嚟計算，當有客人三番四次查詢嘅時候，店員係有責任解釋俾客人知道，而唔係喺到推三推四求其了事，攪到好似我屈佢地送嘢俾我咁，成件上一句對唔住、連唔好意思都無，企喺客人立場我感覺超唔良好，雖然佢地價錢定位係好平好抵，但自今次嘅不歡網購經驗，我自己就唔會再幫襯佢地，免得下次又換嚟一肚氣啦！
