我本身幾鍾意網購，因為貪佢夠晒方便，睇啱落order就可以送上門，今次就試咗喺好多人推嘅美國網站"iHerb"買嘢，其實開咗account都有好幾個月，不過佢實在係有太多品牌/種類俾您揀，我呢啲多心嘅人，唔係一時三刻決定到，係需要一啲時間去揀，所以我一得閒就會上去睇下，每次都會揀啲心水product擺落個cart到。
今個星期一(26-Oct)見有啲時間，就終於的起心肝落1st order，shipping method揀咗用SF Express，想揀用順豐嘅朋友仔就要注意，買嘅嘢唔可以超過某個金額，我今次嘅金額限制係HK$620，重量就要喺20lbs之內，咁運費就只需HK$31.16，送貨時間大概係2-5日，若果超過咗佢嘅limitation就只可以揀DHL，尋日(29-Oct)我就收到箱貨，估唔到運送時間都幾快喎！
同大家講少少喺iHerb買嘢嘅小tips先，首先開account兼第一次購物會discount US$10俾您，購物超過US$40會額外有5% discount，另外每次購物都可以用US$1，喺trials揀一件貨品作為試用，試用都有好多筍嘢揀架，千祈唔好miss咗呢個機會，好啦，急不及待要同大家share下，我喺iHerb買咗啲乜東東返嚟先 ^_^
(1). Sierra Bees, Organic Lip Balms, Variety Pack, 8 Pack HK$7.79 (OP$61.92)
我揀嘅US$1 trials，港幣$7.79就買到1 pack 8支嘅潤唇膏啦，重要係出自Sierra Bees，您話真係可以去邊到搵呢?
(2). Hurraw! Balm, Night Treatment Balm, Blue Chamomile Vanilla, .15 oz (4.3 g) HK$29.75
Hurraw潤唇膏又係好出名，好多bloggers都有介紹過，佢有幾款唔同味道揀，我見已經買咗pack Sierra Bees，所以無按味道揀，反而就睇function嚟揀，揀咗支專for晚間修護用嘅，因為我本身都有瞓前搽潤唇膏嘅習慣。
(3). Thayers, Rose Petal Witch Hazel, with Aloe Vera Formula, Alcohol-Free Toner, 12 fl oz (355 ml) HK$66.98
之前喺香港網店買要$98一支，今次買開嘢就順便order定2支，擺喺屋企做存貨。
(4). Mrs. Meyers Clean Day, Scented Soy Candle, Geranium Scent, 7.2 oz HK$74.77
第一件擺落cart嘅貨，想買香薰蠟燭好耐，但礙於而家大肚唔敢亂用，搵咗幾個brand嚟睇，最後揀咗呢個用大豆做嘅，貪佢純天然配方較為安全，孕婦同小朋友都用得，重有6種味道(Basil羅勒、Orange Clove橙丁香、Cranberry酸果蔓、Lavender薰衣草、Geranium天竺葵、Lemon Verbena檸檬馬鞭草)可以揀，見好多網友都推天竺葵，所以就買呢個味嚟試下。
(5). Sibu Beauty, Sea Buckthorn Seed Oil, For All Skin Types, 10 ml HK$99.39
呢個"沙棘籽油"聞名不如見面，真係超多人推，用作美容話可以美白、去印、去斑，又話可以搽傷口幫助愈合等等，講到佢有啲萬能咁，攪到我都受唔住引誘買咗支細嘅。
(6). EcoTools, Spa Moisture Gloves, 1 Pair HK$31.08
(7). EcoTools, Retractable Kabuki Brush, 1 Brush HK$62.23
又係受人推話EcoTools化妝掃好用，咁啱我想搵啲伸縮掃，細細支方便我帶出街用，見佢平平地就買番嚟試下，另外見有保濕手套賣，順便買對for冬天手乾時帶嚟瞓覺用。
(8). E.L.F. Cosmetics, Studio, Lip Balm SPF 15, Nude, 0.07 oz (2.1 g) HK$18.23
(9). E.L.F. Cosmetics, Get The Look, Eye Makeup Collection, 4 Piece Kit HK$30.38
E.L.F. 嘅化妝品出名平靚正，見佢咗支nude色唇膏幾靚，價錢只係10幾蚊重要有埋SPF 15，香港買支普通潤唇膏都唔得，所以呢個真係must buy item，重有佢set makeup kit，1 set有齊eye primer、eyeshadow、eyeliner pencil同mascara都只係30幾蚊，細細set帶去旅行用就一流啦！
(10). Real Techniques by Samantha Chapman, Miracle Complexion Sponges, 2 pack HK$68.48 (OP$85.6)
(11). Real Techniques by Samantha Chapman, Retractable Kabuki Brush, 1 Brush HK$62.25 (OP$77.81)
(12). Real Techniques by Samantha Chapman, On Location, Travel Essentials, 3 Brushes + Case HK$112.10 (OP$140.12)
Real Techniques嘅化妝掃唔洗我多講，可以話係化妝嘅朋友仔must have item，想擁有佢地已經好耐，終於喺iHerb帶咗佢地返嚟，最開心係咁啱撞正佢做緊限時活動優惠，額外有20% discount，真係"抵抵抵"呀，買咗佢3件product，就幫我慳咗HK$60.7 lu~
最近早晚天氣涼涼地，皮膚又開始feel到乾乾地，就想同大家分享下我用緊Nature Republic呢支Moisture Toner，唔好睇佢texture係水狀，保濕效果真係出奇地好，我已經repurchase咗好幾樽，同line嘅Moisture Cream我都試用過，又係好出色好good good嘅。
講多少少，呢個Super Aqua Max系列分3款，大家可以因應自己膚質去揀，綠色Combination Watery適合混合性肌膚、藍色Fresh Watery適合油性肌膚、粉紅色Mositure Watery適合乾性肌膚。我本身係混合性偏乾皮膚，綠色同粉紅色我都買嚟用過，其實兩款都唔錯幾好用，但我自己就偏好用mositure嗰款多啲，貪佢保濕夠一啲用咗皮膚keep住水潤。
高效保濕爽膚水小資料
包裝：樽裝
容量：150ML
質地：水狀
產地：韓國
價錢：HK$148.0
官方資料
◎SUPER AQUA MAX系列是富含深海礦物質海水和30多種純淨的植物保濕成分，快速持久為肌膚補充水潤，讓肌膚保持水嫩柔滑。
用後感覺
◎先講個packaging，透明玻璃樽已經覺得好正，重要係粉紅色，真係啱晒我心水。爽膚水倒落棉花，您會見到佢係淡粉紅色，抹上面即時feel到補水，我習慣抹完全面再輕拍等佢吸收。
◎吸收完，塊面唔會覺得乾同緊，鎖水做得好唔錯，就算而家天氣涼咗都唔會覺得唔夠保濕。有時皮膚好乾，我會用佢嚟當mask敷5-10分鐘，敷完皮膚會即時回復濕潤同有彈性，上妝都會貼服好多。
◎按佢百零蚊價錢嚟講，唔只做到保濕重鎖水，真心覺得佢物超所值，所以要推介俾大家試下，喺香港專門店會貴少少，若果去開韓國嘅朋友仔，就不妨入多幾支做存貨，包佢唔會令大家失望呀！
之前講過Beauty People嘅cosmetice，今次就講下佢地嘅skincare，佢地嘅皇牌"南瓜去角質霜"係我嘅大愛，重記得一推出就數度斷市，我訂咗好耐先有貨返咋，送到屋企當晚重急不及待試用，好彩結果都無令我失望，等佢耐啲都真係值得嘅！
南瓜去角質霜小資料
包裝：玻璃罌裝
容量：200G
質地：啫喱狀
產地：韓國
正價價錢：HK$268.0
官方資料
◎含南瓜植物性纖維成分，水凝狀質感，帶微微花香，可以軟化死皮、有效袪除老化角質，同時袪除多餘油分及污垢，更有高效保濕功能。
產品成分
◎南瓜果實提取物、白芷提取物、提取物、栝樓根提取物、大豆籽提取物、綠豆角突籽提取物、茶葉提取物、蘆薈葉提取物、黃瓜果實提取物、尿川芎囊素。
用後感覺
◎先提一提佢有份量嘅packing先，佢係玻璃罌裝、容量有成200g，真係唔睇得少都幾重下，大大罌都係賣2百幾蚊，價錢絕對親民兼有排用，所以我每次都大大pat攞嚟粗用，真係一啲都唔會肉痛囉~
◎完成我嘅3 steps洗面程序之後，就開始搽上南瓜去角質霜，慢慢以打圈方式按摩全面，特別係T字、鼻翼位置我會按多幾下，按完我會加少少水再按多一陣，等佢更有效軟化啲死皮同角質，之後先再過水洗咗啲gel。
◎有睇我之前篇"About Me檸檬排毒明亮按摩乳霜"blog post嘅朋友仔都會知，我個人比較鍾意用peeling gel去角質，而我揀呢隻peeling gel嘅原因係佢本身無磨砂粒子，比起一般磨砂膏性質溫和啲，無咁刺激、同唔傷皮膚，用完唔會話令皮膚出現泛紅情況，同埋呢隻peeling有保濕成分，唔會令您覺得皮膚乾同蹦緊，我用完唔只白咗、滑咗、望落膚色亦明亮咗，嗰刻感覺啲皮膚真係乾淨晒lu~
Secret Key呢個牌子，相信大家都唔會覺得陌生，佢地支皇牌酵母神仙水更加被喻為"平民版SKII神仙水"，我都係佢地嘅忠實粉絲，除咗支皇牌神仙水，我都用過佢地支金箔精華化妝水，同樣地我對佢兩支嘅評價都係好好，最近我就試咗佢地另一條product line，Snow White系列裡面嘅美白精華，想睇下佢嘅美白效果又係點呢？
雪白柔嫩精華小資料
包裝：揼裝
容量：30ML
質地：啫喱狀
產地：韓國
價錢：HK$108.0
官方資料
◎舒緩鎮靜，賦予肌膚緊實的彈力感。
◎谷胱甘肽和珍珠粉提取物成分，讓肌膚煥發華麗光彩。
◎濃縮的維他命膠囊的精油成分，呈現健康美麗肌膚，持久光彩照人。
◎無添加 對羥基苯甲酸酯、礦物油、二苯甲酮、苯氧基乙醇、色素。
用後感覺
◎我個人幾鍾意揼裝嘅設計，用幾多就揼幾多，可以易啲控制用嘅份量，同埋質量保存得好啲、感覺又乾淨衛生啲。
◎揼兩下份量就夠搽晒全面，精華嘅質地係gel狀，幾易推開同幾快吸收，搽完感覺有層薄膜cover住，但又唔會話笠痴痴。
◎一般美白精華我都係朝早先搽，晚刻我就著重搽保濕精華多啲，so far我用咗佢一個月，但效果唔覺得好顯著，皮膚亦無話明亮、白淨咗，所以對佢都有少少失望，睇下遲啲用晒會唔會有咩改善，anyway，用完我都應該唔會再回購佢lu~
相信唔少朋友都識得"千頌伊"嗰支 - 玫瑰精華護髮油架啦，追"來自星星的你"嗰期，我都唔執輸樸咗支返嚟，真心講嗰支髮尾油係work，髮質明顯好咗好多、用完唔會油又唔會笠，絕對唔係明星效應咁簡單，我自己都有keep住回購咗2次，跟住我見同牌子有新嘢出，就轉咗買佢支"鑽石級"嚟試，結果Mise En Scene都無令我失望，我對佢嘅評分都係好高無得頂，等我同大家分享下我嘅用後感先啦~
鑽石級髮尾油小資料
包裝：揼裝
容量：70ML
質地：油狀
產地：韓國
價錢：HK$65.0
官方資料
◎蘊含高濃縮蜂王漿、堅果油、玫瑰水，修復受損髮質，解決分叉乾枯，瞬間柔順亮澤含高濃縮摩洛哥堅果油堅果油，蜂王漿蜂王漿，玫瑰水玫瑰水，針對損傷髮質的濃縮精華素，提供光澤，彈力和滋潤感同時順滑頭髮。
◎瞬間快速吸收，帶來不粘膩的平滑使用感，爲每根毛發提供營養，幫助護理受損毛髮，帶來健康護理的頭發護理精華，每次只需用少許，受損髮質就會有明顯改善，秀發豐盈飄逸、易於梳理、柔順爽滑，閃現動人光澤。
◎含高效頭髮柔順因子，長效亮發因子和營養精華，補充多種營養，能消除頭髮靜電，解決髮根分叉，頭髮乾枯，沒有彈性，缺乏光澤光澤，燙染後損傷髮質等各種問題，打造柔順秀髮。
用後感覺
◎一般我習慣夜晚洗完頭，用毛巾抹乾少少啲頭髮，跟住揼4下髮尾油，喺掌心揉熱啲油，然後擦上頭髮(由中段頭髮開始，特別加強喺髮尾部份)，之後直接梳番頭就攪掂。
◎試過用其他牌子髮尾油，用完好似吸收唔到有層油hold起個頭，到瞓覺嘅時候啲油就會整污糟個枕頭，但係呢隻牌子so far我用過"玫瑰精華"+"鑽石級"兩個系列，都無出現呢個問題，就算我偶然朝早用，都唔會話出現油頭情況，無論乾濕頭髮都吸收得好好。
◎平時會由得啲頭髮自然乾，但有時我就會用風筒去吹乾，當用風筒吹乾頭髮嘅時候，會好明顯睇到有用、同無用髮油嘅效果，無用啲頭髮吹完會鬆散同乾一啲，而有用啲頭髮吹完會好柔軟順滑，乾爽得嚟連毛燥天線都唔多覺。一直有染頭髮習慣嘅我，keep住用咗Mise En Scene系列好幾個月，髮質都有明顯嘅改善，頭髮無咁乾旱同開叉，最重要一點係佢唔油、又吸收得快，所以係我大愛回購產品，真心一定要推介俾大家，最近我重買埋佢紫色嗰set洗頭水+護髮素，用咗個零禮拜暫時都好滿意，等試用多一排遲啲先再同大家share個用後感。
Banila Co. 化妝品出名唔洗多講，佢嘅卸妝產品同樣都係咁出色嘅，除咗皇牌卸妝膏"Clean It Zero"之外，佢隻Golden Aole潔膚水都一樣係咁好用，若果您問我兩隻邊隻好用啲？我會答您兩隻都咁好用，只可以話睇您嘅膚質同喜好去揀。
卸妝膏按摩後會由膏狀變成油狀，個texture較為滋潤少少，唔會令皮膚繃緊同乾，而潔膚水就係水狀，相對油狀會清爽啲。至於講到潔膚能力，Clean It Zero聽個名"zero"都知佢勁，佢嘅賣點係連眼唇妝都一take過可以攪掂，親身試用過真係幾work，相反Cleasing Water嘅卸妝能力就無咁強，只可以卸到淡妝、防曬嗰啲，大家可以因應自己嘅需要去揀。
黃金蘆薈潔膚水小資料
包裝：揼裝
容量：200ML
質地：水狀
產地：韓國
價錢：HK$168.0
官方資料
◎蘆薈水含量高達87%，清爽滋潤+清潔肌膚雙效合一，可有效潔淨妝容及外部環境帶來的殘留物，保濕滋潤，舒爽備至。
◎GoldenAloe蘆薈金果，以 1:31黃金組合成份，為全身帶來水潤清爽享受。蘆薈成份來自陽光明媚的加州，加上紐西蘭麥盧卡蜂蜜和黃金奇異果、法國洋甘菊，為肌膚補水、滋潤舒緩及保濕。
用後感覺
◎揼裝設計較為方便，直接用棉花按壓就可以攞到潔膚水。
◎一般我習慣先全面+頸抹一塊棉花，之後再抹多一塊，確保卸得乾淨。
◎潔膚水較油清爽，呢隻蘆薈金果成分，清爽得嚟都好潤身，抹完兩次都唔會覺得乾、或者刺激皮膚，佢嘅潔膚效果都唔錯，淡妝都ok卸得好乾淨。
◎講到佢賣點之一，係可以抹完唔洗過水，但係我個人就會習慣過水，始終過一過水感覺安心啲，同埋可以確保徹底去除咗啲污垢。
