Shara Shara Fairy's Assemble Dresser

相信去韓國旅行嘅朋友仔，出發前都會四出搜羅一下，睇下網上有咩好產品介紹，我就無意之中睇到J2台嘅"姊妹淘 - 姊妹心頭好"介紹嘅一set貼心 face cream組合，外型係有個cute cute公仔頭，就係咁我就keep in mind，不過嗰時我重未知佢係咩牌子出品，所以都無特別mark喺我嘅shopping list。

 

直至我去到韓國，行明洞嘅時候見到有間shop佈置得好靚，就吸引咗我入去Shara Shara，踏入舖頭意外地見到兩個cute cute公仔頭，oh！原來就係佢地啦，我梗係急不及待去認識下佢地先啦，正當考慮緊心大心細，買邊個公仔頭靚啲，sales姐姐就走嚟逐款介紹佢地嘅功效，重話我聽佢地做緊咩promotion，結果我就掃咗3個公仔頭、2罌face cream、同兩粒eye shadow返歸 ^_^

其實我除咗buy佢地個公仔頭，我重貪佢地個design夠方便，平時用開day同night cream分開嘅就會知道，用唔係問題，擺位先係一個煩惱，而Shara Shara呢set組合就fit到我需要，只要揀好您心水嘅cream，然後上下扭埋一齊就ok，呢個直立式收納法，真係夠晒方便又慳位喎~

先講上層嘅仙子公仔頭，佢有兩款可以揀，綠色身係Make-up Synergy Sun Cream、藍色身就係Glow Foundation，公仔身就有多啲啲嘅選擇，有5款俾您揀，分別係Aqua Bomb Cream、Vital Beam Cream、Morning Massage Cream、EGF Wrinkle Cream同Snake Tox Filler Cream，大家睇到我呢set自選組合，就分別係公仔頭嘅"綜合防曬霜"+公仔身嘅"水份美白面霜+蛇毒滋潤面霜"，而另外藍色公仔身嘅"明亮粉底液"我就重未開嚟用，留番下次試用完先再同大家分享啦~

 綜合防曬霜小資料
包裝：瓶裝
容量：30ml
質地：cream狀
產地：韓國
正價價錢：HK$307.0

水分美白/蛇毒滋潤面霜小資料
包裝：罌裝
容量：50ml
質地：cream狀
產地：韓國
正價價錢：HK$293.0

官方資料 - 綜合防曬霜
◎雙重防紫外線效果SPF45 PA++，能完美的保護肌膚
◎植物性專利，幫助鎮靜受損肌膚
◎無黏膩的輕柔使用感，幫助長時間維持適度
◎具有優異緊貼力，幫助彎曲凹陷的肌膚恢復原本生機和活力
◎成分含水稻提取物，鎮靜專利成分(苦參、柚子)，彈力強化專利成分(積雪草、遠志、桔梗)，屏障強化專利成分(糙米、綠茶、蒲公英根)

官方資料 - 水份美白面霜

◎純天然植物配方，有效明亮肌膚

◎含西蘭花提取物，有抗氧化功效，美白肌膚

◎含雜莓提取物預防色斑，延緩肌膚老化

官方資料 - 蛇毒滋潤面霜
◎含多元胜肰成分，幫忙皮膚維持彈性，使皮膚緊緻飽滿

◎含腺苷和胜肰複合成分，改善面部、頸部皺紋
◎含豐富有效成分，為皮膚補充水分及營養，幫忙皮膚持久滋潤光滑
◎含EGF及葡聚醣等成分，改善受外間環境刺激而受損的皮膚

 

用後感

(1). Make-up Synergy Sun Cream (Assemble Dresser)

◎先講防曬霜，樽嘴係揼裝設計，睇落好似好方便，初時個揼嘴都好ok，好輕易就可以揼到啲sun cream出嚟，用咗唔夠一星期，發覺佢好難揼得出嘢，心諗30ml無理由咁快用晒架？扭開揼嘴見到重有好多cream，但唔知點解揼極都唔係好揼到，而家每朝唯有要扭開佢，用條管撩啲cream上嚟用，都真係幾麻煩囉 =_="

 

防曬霜有SPF45 PA++防曬度，一般日常外出用都好夠protect，我平時返工都係搽完face cream再搽佢就出門，佢質地係cream狀唔會太杰身，搽上面好易推開，上面後唔會話焗身、好油、好黏，同幾爽身下嘅。

 

(2). Vital Beam Cream (Assemble Dresser)

◎跟住講我用嚟做day cream嘅美白面霜，佢質地一樣係cream狀同唔太杰身，搽上面又係好易推，上完面又係好爽身同唔厚。

(3). Snake Tox (Filler Cream)

◎最後輪到我嘅night cream之選蝸牛面霜，質地都係cream狀但比較杰身，不過佢搽上面都ok易推，唔會話唧住隻手，上完面感覺有層薄膜cover住，同埋較為潤身少少，搽完去瞓覺就一流，涼住冷氣第二朝起身，塊面都唔會乾同蹦緊，just fit！

 

總結3樣product，不論包裝、設計、同功效，我嘅comments都係good，覺得值得推介俾大家，特別係去韓國買會抵用好多。

 

 

 

Batiste Dry Shampoo

早前6月走咗轉台灣，出發前準備咗張shopping list，大部份嘅product都買齊，其中有樣好想試嘅"乾洗頭髮噴霧"買唔到，返咗嚟幾個月原本無咗件事，點知早幾日行街無意中俾我見到佢，所以話呢：唔係我嘅唔洗恨，係我嘅就始終都係我嘅，今次可以講係：得嚟全不費功夫，買嘅時侯見到有3款，Original原味、Wild狂野、同Blush花香，我一嚟就俾非常討好嘅粉紅色樽身(花香味)吸引住，所以唔洗多揀就帶咗floral & flirty blush返屋企lu~

頭髮乾洗噴霧(花香Blush)小資料
包裝：噴霧(壓縮氣體)樽裝
容量：200ml
質地：粉狀
產地：英國
正價價錢：HK$39.9







官方資料
◎英國製造
◎吸走頭皮上多餘油脂及塵垢
◎快速解決頭油問題
◎頭髮持久清新乾爽
◎適用於任何不方便洗髮之場合：上班、上學、坐月、手術前後等

產品成分
◎紅木槿、香雪蘭、晚香玉、橙花、牡丹、百合

產品用法
◎先把罐搖勻，以12吋(30cm)之距離均勻地噴於頭髮上，輕輕按摩，待數分鐘，以密齒髮擦梳理，無需沖洗

用後感覺
◎本身我有每日洗頭嘅習慣，今次第一次用乾洗頭髮噴霧，想試佢嘅原因係夏天出汗多，加上我頭頂有啲髮碎，平日我會用Utena出品嘅matomage hair styling stick魔髮球去撫平啲毛毛，但係當出汗太多，加搽咗定型髮膏嘅頭髮，就會變得比較油同笠，所以想試下呢個dry shampoo幫唔幫到我，令頭髮回復乾爽、唔會睇落油同笠到一pat pat。

專登做完一日嘢，放工返去用個油/笠頭嚟試，先遠距離噴上頭髮，聽人講噴咗會有白色粉末，我都擔心唔知會唔會變咗粉頭人，不過我噴咗兩下又唔見有白粉喎？花香氣味都好清新，跟住第一個即時感覺係有度氣壓壓住個頭，feel到頭髮好似變硬咗咁，但係用手按摩嘅時候摸落又唔係硬，反而摸到啲好微細嘅粉粒，而啲頭髮係好乾爽嘅，按咗一陣用梳梳下(我屋企無密齒梳，只係用普通梳嚟梳)，梳完照鏡真係好surprise，啲頭髮望落好柔順、好乾爽、一啲都唔油唔笠，30幾蚊即時work out到個效果，真心覺得佢好用，所以好值得推介俾大家 ^_^

題外話：若果大家想攜帶方便啲，佢重有細一個size係50ml(無記錯嘅話)，咁樣帶出街或者帶去旅行用，可以袋落袋就方便好多啦~