幸運嘅我早前又中獎，事不宜遲，同大家分享下我中咗咩獎先，今次又係抽中咗MeClub嘅獎，中獎名額有90人，顧名思議我就係90分之1啦，而呢次嘅獎品就係 --- 頭髮修護噴霧1支。
雖然中咗呢個唔係咩大呀、貴嘢獎，但係收到中獎信嘅email時份外開心，事關我本身係有染開頭髮，大大話話都keep住染咗成10幾年，髮質唔多唔少都有受損，平時都有用開髮尾油嘅習慣，今次收到呢支專for染髮後修護嘅噴霧，真係覺得係好啱我洗嘅禮物嚟 ^_^
上年結婚染咗個淺啡色，等set頭後出嚟效果可以明顯啲，但係就要先退色後再上色，攪到啲髮質都差晒，由嗰時起我就開始用L'Oréal Professionnel Vitamino Color系列，洗頭水+護髮素孖住嚟用，鎖色效果真係唔錯，啲顏色long lasting咗，連啲頭髮都keep住柔順埋，所以我都幾buy呢個牌子，覺得貴少少都值得keep住買嚟用。
包裝：支裝噴霧
容量：190ml
產地：西班牙
正價價錢：HK$278.0
官方資料
◎保護染後髮絲、閃耀亮澤、終極柔軟、呈現一致頭髮質感、提供高達230度的抗熱保護、減少打結、易於梳理、減少折斷、保護開叉髮尾、減少毛躁。
◎蘊含向日葵花籽精華、維他命 C及 E、黑色素、茴香籽精華、木糖等，有助提供多重美髮效果。
用後感覺
◎今年因為有咗baby，暫時都無再去染髮 ，而之前染落嘅colour又未甩晒色，剪又唔可以話一次過剪走晒佢，家下啲頭髮兩截色不特只，啲colour無晒光澤，髮尾重有啲乾同開叉嘅問題，已經keep住用"星星髮尾油"Mise en scene damage care perfect serum，洗完頭搽完等佢吸收晒先再吹頭，搽完佢都叫ok唔會好油，用完啲頭髮都幾順滑，但係佢始終係油性，朝早我就唔會揀用佢，怕會整到啲頭髮好油同好黏膩，而家多咗支spray我就可以攞嚟朝早用，oh，that's good！
◎講番支infinite spray先，一睇樽身寫住"made in spain"已經覺得好放心，起碼唔係made in china先嘛，再加上佢含有多種天然精油成分，呢點真係中晒我嘅大愛point囉！噴上頭髮，佢嘅噴霧出嚟係好密、每噴一下份量都好足，噴4下已經cover到我成個頭(我頭髮及肩)，我就會梳順啲頭髮先，跟住我習慣會再喺髮尾重點噴多兩下，然後再梳多一次髮尾。
◎噴完spray感覺好乾爽、啲頭髮唔會有黏膩感，望落啲髮質柔順同有光澤咗，隔咗幾個鐘再梳頭，都唔會出現卡頭髮嘅情況，頭頂啲毛毛都撫平到無咁毛燥，大致上我keep住用咗一星期(每朝用)，都幾滿意個效果，至於您話做唔做到"保護染後髮色、減少頭髮折斷同開叉、係咪可以抗熱力保護"呢啲功效，我就未試到出嚟，可能要等用長啲時間，用晒一支先知係咪真係work out到。
