Bicelle Hydra B5 Cream Mask

早前試用Bicelle嘅皇牌產品"B5 Gel"確實超好用，保濕、鎖水效果真係無得頂，我keep住日日朝早用佢，30ml都夠我用個半月有多，而家已經去到樽底就用晒lu~

最近見天氣轉涼，皮膚水份流失得好快，即刻諗起罌B5 cream mask，梗係嗱嗱聲摷番佢出嚟用，一用之下效果出奇地好喎，所以要喺到同大家share下 ^_^

全效維係命B5補濕面膜資料
包裝：罌裝
容量：100g
質地：cream狀
產地：美國
價錢：HK$550.0

官方資料
◎成分 - 透明質酸、維他命B5、甘油、蜂蠟、維他命E

◎功效 - 深層補濕鎖水，肌膚回復水盈飽滿、強效修護，減少幼紋及乾紋、高效抗氧，抵抗游離基、滋潤乾燥皮膚、改善暗啞

◎使用說明 - 適合任何皮膚、每星期使用2至3次，每次敷10至30分鐘，再用清水洗淨或用化妝棉抹淨

用後感覺
◎打開罌mask真係好似平時搽嗰啲cream咁，哈哈，唔留神睇清楚都唔知係mask嚟，要小心喔！cream mask質地好soft，建議大家用支棒棒嚟攞，一嚟份量可以控制得好啲，二嚟keep得罌嘢衛生啲嘛！

◎上面感覺好舒服，唔會好杰身、又唔會邊敷邊漏，搽咗上去可以放心做嘢都唔怕，第一次因為時間關係，我敷咗10分鐘就過水，抹乾塊面摸落好滑溜，皮膚覺得飲飽咗水咁，即時做到有保濕效果。第二次我就敷夠30分鐘先過水，同樣係摸落有滑溜、保濕嘅效果，之外睇到細紋、乾紋明顯撫平咗，滋潤感last到第2日重keep住鎖水。

◎暫時用咗2次效果我都好滿意，無時間用10分鐘嚟急救肌膚確係唔錯，有時間敷耐少少出嚟效果更加perfect，總括用咗Bicelle兩樣product，都覺得佢地嘅保濕做得好唔錯，佢地嘅價錢雖然貴少少，但都可以話係valuable嘅，有budget嘅朋友仔都不妨買嚟試下。

Beauty People Orginal EMU Cleansing Foam

Beauty People嘅產品出名"平靚正"嘅，除咗eye shadow/liner、眼唇卸妝液、佢嘅南瓜peeling gel都係我嘅至愛，最近重試埋佢支EMU洗面膏，用完感覺係非常良好，所以要同大家分享一下先得~

專業潔面泡資料
包裝：支裝
容量：200g
質地：膏狀
產地：韓國
價錢：HK$104.0

官方資料
◎含有植物精華及Emu Oil，Emu Oil 來自澳洲的鴯鶓鳥，牠的油脂是澳洲原住民的祖傳秘方，也是澳洲高經濟價值的特產，醫學研究及臨床實驗顯示鴯鶓油具有滋潤和保護皮膚功效，能夠輕輕地從你的臉上，去除化妝殘留物充分同時清潔，並保持皮膚的明亮的皮膚。

用後感覺
◎BP嘅包裝係唔花巧、好簡約嘅，唧出嚟同一般膏狀洗面膏無咩分別，加水起泡啲泡係好幼細、好濃密，打圈按摩面部感覺好soft、啲泡沬好細滑，洗完過水好乾淨、同時膚色明亮咗，塊面摸落重好滑、一啲蹦緊嘅感覺都無，真心覺得好用，值得推介俾大家。