Fascy Moisture Bomb Hand Cream - Mango

秋冬唔只潤唇膏用得快，一支潤手霜同樣都好快玩完，所以呢日又有機會俾我開支新嘢嚟試，喺我一堆存貨中就抽咗Fascy出品嘅保濕hand cream，當日係俾佢個cute樣吸引我買佢返嚟，唔知佢好睇又好唔好洗呢？

芒果味爆水護手霜資料
包裝：支裝
容量：80ml
質地：cream狀
產地：韓國
價錢：HK$45.0

官方資料
◎內含6種植物精華成分，超強保濕，持久鎖住水分，滋潤效果卓越，有助改善乾燥、龜裂、粗糙，氣味芬芳怡人，使用無油膩感。

小Hi用後感
◎撕開銀錫紙，唧出hand cream即時有好濃郁嘅芒果味，果味sweet得嚟唔會太假，令人感覺好fresh，大讚！

◎hand cream嘅texture好creamy，上手好易推開，吸收都算好快，佢嘅保濕同鎖水都做得唔錯，搽咗唔會覺乾，hold喺手有滋潤感但又唔會笠。

◎至於味道方面，mango味都keep得幾耐下，唔似我之前介紹嗰隻"Rosemine香水"系列咁快散味，對手仔可以keep住香噴噴。總括嚟講，我幾滿意呢支hand cream，唔只有cute cute賣相，內涵佢都一樣兼備埋，加上價錢都算幾親民，值得推介俾大家試下。
 

Nature Republic California Aloe Daily Moisture Sun Block SPF50+ PA+++

講到防曬產品，絕對係一年四季不可少，街出面啲紫外光線太強勁，正所謂個底要打得好先得，曬得太多唔只會傷到皮膚，曬到出雀斑嗰時更加喊都無謂，到時點勤力敷mask都於事無補，皮膚保養對我地嚟講係好重要，防曬產品點都絕不能少，所以我就算幾攰、幾懶都好，搽完day cream唔搽精華液，我都一定會on top搽防曬先出街，今次就同大家share我其中一件大愛嘅防曬產品~
 

 
加洲蘆薈日常保濕防曬乳資料
包裝：唧裝
容量：50ml
質地：cream狀
產地：韓國
價錢：HK$119.0
 
 
 
 
 
 

 

官方資料

◎成分：煙酰胺、腺甘、蘆荟葉汁5,000ppm。含有提亮膚色的粉色色澤精華，讓肌膚煥發粉嫩的透明感般的瑩潤亮澤。蘆薈爲肌膚補充水分和營養，舒緩鎮靜肌膚壓力。輕盈不黏膩，柔和緊貼肌膚，維持水潤肌膚。

 

◎7無添加(對羟基苯甲酸酯類、二苯甲酮-3、三乙醇胺、變性酒精、丙二醇、硫酸鹽系表面活性劑、焦油色素)。

 

用後感覺
◎防曬乳唧出嚟係淡粉色，搽上面推開之後就無色，唔洗擔心佢搽到一撻撻，佢質地好creamy，唔杰身、超易推開，搽完上面唔笠身重好清爽，加上佢嘅保濕做得幾唔錯，一啲都唔會出油或者覺得乾。

◎Nature republic嘅產品，so far我暫時用過佢嘅爽膚水、面霜、精華液、卸妝油、peeling gel、洗水式mask、片裝mask，樣樣效果都算係幾滿意，同埋佢啲product價錢幾大眾化，大家都可以afford得起買嚟試嘅。而呢支防曬乳我已經用緊第2支，真心覺得good good，值得推介俾大家，另外喺買第2支嘅時候，重入手埋佢同系列另一款嘅"長效防曬乳"，若果大家係想for平日返工或者出街用，我個人覺得買"日常"嗰支就已經好足夠，"長效"嗰支for去戶外活動/長時間係室外比較適合，至於長效嗰支我重未有機會開嚟試，等我遲啲試用咗先再同大家分享啦！