有時買mask，未必一定係睇成分、功效先，反而俾佢嘅packing吸引咗，講緊嘅係"不二家"出品嘅cute cute"牛奶妹"造型mask，佢唔只包裝吸引，連個價錢都好親民添喎，幾十蚊一包就已經有4塊，所以話唔買嚟試下，都真係對唔住自己囉~
牛奶保濕面膜小資料
包裝：獨立片裝(1包4片)
容量：22ml
質地：棉質
產地：韓國
正價價錢：HK$51.8
官方資料
◎蘊含牛奶、玻尿酸、膠原蛋白、乳蛋白精華成分
◎滋潤保濕，令肌膚更添白滑
用後感
◎撕開包裝袋，見到佈滿咗精華、偏厚棉料嘅mask sheet，取出面膜，包裝袋重有少量嘅精華液喺到，唔想浪費，可以搽埋落頸/手/腳位。
◎呢個mask特別之處，係佢連埋個眼位俾您，鍾意敷埋眼又得、唔敷眼可以摺咗個位敷喺眼肚位置都得。
◎敷上面，有淡淡香味，不過唔似牛奶味，我呢啲唔飲奶、聞到奶味都想嘔嘅人都接受到。
◎由於塊mask較厚身，貼服度就無咁好，不過佢有足夠嘅精華液，敷上去都hold得住，啲邊位都唔會話飛起晒。
◎敷咗10分鐘，感覺好滋潤、好飽水，但係有少少黏膩感，索性走去過一過水，過完水都keep到水潤、同有彈性，最令我意想不到嘅係，佢竟然有美白功效，令我嘅皮膚白滑咗，咁親民嘅價錢同時做到保濕+美白嘅效果，真係覺得好超值囉！
溫馨提示
◎之前喺YouTube睇片，有blogger出咗個試用感，佢overall嘅comments都係覺得good嘅，但佢提出咗一點就係話，佢敷嘅時候有拮拮地嘅感覺，不過就無話有出現敏感/泛紅。所以想提提大家，正如我試用後都話work out到美白效果，有時美白成分過強，唔係個個膚質都受到嘅，特別係敏感肌就要小心，呢隻mask就未必suitable for you！
