今次同大家分享嘅係，上次團購咗5樣產品嘅第2樣"激光修護安倍液"，聽個名叫Laser好似好勁咁，但收貨嘅時候見到佢嘅包裝咁簡單，真係有啲驚佢唔知會唔會係雷品嚟呢？？？
安倍液小資料
包裝：小瓶連瓶嘴裝(樽嘴需自行組裝)
容量：7ml(安倍液)+0.3gm(專用混合粉)
質地：水狀
產地：韓國
正價價錢：HK$230.0
官方資料顯示：激光粉(100%純維他命C等)，搭配多種活性成份(熊果苷、煙醯胺、腺苷和肽)，可有效移除肌膚廢棄物、深層清潔毛孔污垢、美白亮膚，令肌膚回復原有剔透感。
*溫馨提示：
為確保安倍液成份新鮮，開瓶使用時方混合專用粉，而開瓶後盡量於一星期內用完。
小Hi用後感：
(1). 組裝異常麻煩
話說拆開紙盒包裝，倒出支安倍液+樽嘴，由於佢本身無說明書，加上激光粉係連接住瓶身，我研究咗一陣都唔係好知點用囉！初時我嘗試以按壓形式直壓個粉落去，但係壓極都無反應郁都無郁過咁，我就唯有又試下大力將個粉樽拔起，呢次俾我成功拔出，但係同時間啲粉就跌晒出嚟(起碼無咗三分之一0.1gm嘅粉)，睇睇下唔多對路咁款，我又將個粉樽套番落個樽身，再不停大力按壓個粉塞落去，來回幾轉終於成功將個粉塞壓開，啲粉今次可以直落安倍液樽身(原來之前係我太鍚住佢，唔夠暴力壓唔開個粉塞)，再套回樽嘴上下搖晃等佢啲粉可以同液體混合。
(2). 激光粉混合不均
經過多次上下、左右搖晃混合安倍水，但倒出嚟嘅安倍水仍然有明顯嘅粉粒喺到，放喺掌心打圈，嘗試將啲粉粒混入安倍水，等佢溶化喺安倍水之中，但係當搽上面嘅時候，啲粉粒都keep住stay喺到，攪到每次用都要花時間去按摩面上嘅粉粒，先可以吸收得晒啲粉。
(3). 上面效果蹦緊
聽個名"安倍水"無呃您，真係水到無朋友囉，拍上面總係有啲水會滴番落嚟，攪到您一手都係水，唯一值得我讚嘅係，上完面超快吸收晒，感覺都幾乾爽，但過一陣好快會feel到塊面有蹦緊，要即刻top up加番面霜先唔覺乾。
(4). 整體總結
根據官方資料嘅"深層清潔毛孔污垢、美白亮膚，令肌膚回復原有剔透感"嘅功效，我暫時用咗4日(因為用後皮膚較乾，所以我只係朝早先用)，唔覺得佢可以清除毛孔污垢，亦唔覺得肌膚特別明亮咗，唯一睇到啲效果嘅佢做到有剔透感，若果以$230.0嘅價錢去計，就一啲都唔值得推俾大家啦，始終2百幾蚊可以有更好嘅選擇，相反以團購價$45嚟睇，幾十蚊嘅價錢就粗粗地用佢ok嘅~
沒有留言:
張貼留言