Pure Smile Choosy Jelly Lip Mask + Lip Scrub

 

放假見無所事事，Mask前一晚又敷咗，就諗起我之前買咗未用嘅Lip Mask，橫掂我個嘴仔都有啲甩皮，所以就順便做埋個磨砂，幫個嘴仔嚟個一條龍服務啦~

 

順帶一提個Lip Scrub係有3種味道，分別係Peach Milk蜜糖牛奶味、Honey Vanilla蜜糖雲呢嗱味、同埋Brown Sugar黑糖味，而日本重會有多隻Chocolate朱古力味添，而我用緊嘅就係好sweet sweet嘅Honey Vanilla ^_^

 

 

 

 

 

Lip Scrub (Honey Vanilla)小資料

包裝：盒裝(外包袋裝)
容量：25g
產地：韓國
正價價錢：HK$51.8




官方資料
◎去除唇部死皮角質，令雙唇變得幼滑，回復柔軟滋潤，撫平唇紋。

使用方法
◎先清潔雙唇、印乾水分，沾取少量磨砂塗於唇部，用手指輕輕按摩，以沾濕化妝棉輕拭，或以清水洗去。

用後感覺
◎打開Lip Scrub盒蓋，就會有一陣好sweet sweet嘅vanilla味，粉橙色嘅磨砂粒子好幼細，攞少少喺唇嘅中央，再慢慢向外推開，以打圈嘅方式按摩，按摩完用濕嘅化妝棉抹走磨砂，您會feel到嘴仔無晒啲死皮，摸落即時感覺好soft同smooth，接住用埋個Lip Mask滋潤番個嘴仔先！

 

Lip Mask (Honey)小資料

包裝：獨立片裝
容量：3ml
質地：啫喱狀
產地：韓國
正價價錢：HK$7.0

呢款Jelly Lip Mask同樣係有幾款味俾您揀，呢個系列分別有Milk牛奶、Honey蜜糖、Peach蜜桃、Fruit鮮果、同埋Herb茶樹，我就買咗兩款(Honey & Peach)嚟試，今次先用咗Honey味，另外見佢重有Pearl系列，同樣有5種Black、White、Gold、Pink、Purple任您揀。





官方資料
◎敷5-30分鐘，超強保濕力，滋潤嘴唇令雙唇水嫰，去除角質改善脫皮情況，唇膜另有淡化黑色素功效。

成分
◎Vitamin E、Collagen、Hyaluronic Acid

功效
◎添加蜂王漿萃取物，讓您擁有一個平滑有光澤的嘴唇。

用後感覺
 ◎撕開包裝袋，有一層膠膜包住佈滿精華嘅Jelly Mask，敷喺嘴仔cover得好好、好貼服、唔易移位，啫哩狀感覺好舒服，啲精華唔會吸咗入口。


敷完30分鐘除落嚟，個嘴仔唔會話好濕潤但係好有彈性、唇紋亦都減淡咗，下次試下唔好hold喺嘴咁耐，睇下保濕效果會唔會再好啲先。


另外呢款mask重有一個得意之處，就係佢除咗可以敷喺嘴仔之外，重可以用喺我地個敏感部位"胸"部嘅乳暈到，因為佢有淡化黑色素嘅作用，有需要嘅朋友仔，可以試下佢呢個效果又work唔work啦！


*溫馨提示：若果大家唔似我，喺敷Lip Mask前有用Lip Scrub，或者本身都無Lip Scrub產品喺手，咁我就建議大家敷前先用暖水整濕條毛巾，再將毛巾熱敷喺個嘴仔5分鐘，咁樣就幫到我地軟化角質，等一陣敷mask時嘴仔可以更加吸啲收精華、效果會更好。