Mannings開心價精選產品75折

見屋企支牙膏就嚟用晒，一心諗住去萬寧睇下買番支補倉啦，點知咁好彩又俾我撞正佢做"開心價精選產品75折"喎，咁就順便睇下有咩好嘢執埋返屋企啦~

15-Aug 戰利品

今次唔係買咗好多嘢，因為有啲上次我做95折時已經買咗，有啲今次都喺discount範圍內都唔緊要，最慘係我買咗都未開嚟試用，而家先買重平得多，我真係要呻笨囉=_="

(1). 高露潔光感美白牙膏100g 2P   HK$39.9 買一送一 (OP$39.9 1P)

(2). Faith in Face 深層保濕面膜3片   HK$52.40 (OP$85.0)

(3). Faith in Face 極緻美白面膜3片   HK$52.40 (OP$85.0)

(4). 我的美麗日記角鯊烯修護面膜8片   換購價HK$45.0 (OP$85.0)

好啦，講番今次我一心去買嘅重點產品先，記得呢支美白牙膏上次新出時Wastons做promo買一送一，我就係俾佢嘅優惠吸引咗買嚟試，其實對佢嘅效果都無抱咩特別期望，因為我試過好幾個牌子(Crest、黑人、Smoca、獅王etc)嘅美白牙膏/牙粉，都唔見得幾有效(我啲牙黃都係茶漬所致)，甚至同牌子Colgate同系列Optic White淨紅盒嗰支我都用過(即係搵全智賢賣廣告嗰支)，效果都唔係話特別出色。


之前買一送一開嚟試，佢賣點係話一星期令牙齒更亮白，初時用都唔覺有幾work，好似出唔到咩效果咁囉，直至我用到一支半時，有日我照鏡無意中先發現，我部份茶漬無咗(真係無咗喎)、有啲淨番好少好淡嘅茶漬，即時令我覺得好驚喜呀，估唔到呢支真係幫到我，所以我就決定去repurchase啦，最估唔到係咁啱佢又做緊買一送一，我又可以慳番一半價錢繼續用佢lu~


真心覺得好用而推介佢俾大家，所以搵多少少資料俾大家睇下，一齊認識下呢支Optic White Plus Shine閃鑽亮白牙膏，佢成分含溫和微細亮白粒子(焦璘酸鈣)，可以幫助拋光牙齒表面，針對外源性牙漬，令牙齒更亮白。